Armentia Ikastolak euskaldun eleanitzak hezteko helburua du, eta horretarako Hizkuntza Proiektua du abian. Proiektu hori aurrera eramateko, Hizkuntza Batzordea (HIZPRO) dugu lanean, eta bertan euskara eta euskaratzea ardatz hartu, eta ikastolan lantzen diren hizkuntza-irakaskuntza eta erabilera bildu eta haien trataerari koherentzia ematen diote.
Ikastolako komunitate osoko kideek parte hartzen dute Hizkuntza batzordean: Gurasoen Euskara Taldeko kideak, ikasleak, zuzendariak, Artezkaritzako kideak, etapa guztietako irakasleak, zerbitzuetako arduradunak eta eskolaz kanpoko ekintzen arduradunak. Hain zuzen, guretzat ezinbestekoa da komunitate guztiaren inplikazioa, izan ere, esku-hartze eremua ikastola osora zabaltzen da (gela barruan eta kanpoan, familiak, kanpo harremanak…), eta arlo horietan guztietan eragitea dugu helburu.
Hala, urtean hiru bilera egiten ditugu. Ikasturte hasierakoan, urteko plana guztion artean lantzen da; bigarrenean, jarraipena egiten da, eta hirugarrenean, balorazioa egiten da eremu desberdinen arteko koordinazioaren bidez.
Aurtengo lehentasunen artean eskolaz kanpoko eremuan eta familietan eragitea da:
- Eskolaz kanpoko eremua oso garrantzitsua iruditzen zaigu. Izan ere, arlo akademikotik kanpo, aisialdian eta eremu ez-formaletan hizkuntzaz jabetzea eta erabiltzea funtsezkoa da ikasleek euskara arlo ludikoekin eta dibertigarriekin ere lotu dezaten. Hori horrela izateko, ikastolako hezitzaileen lana oso garrantzitsua da.
- Familien eremua ere ezinbestekoa da, gurasoak beren seme-alaben eredu baitira. Ikastolako familien artean euskara dakiten gurasoak gehiengoa badira ere, horietako asko oraindik ez dira animatu seme-alabekin euskaraz egitera: guraso horiei hizkuntza ohiturak aldatzea zein garrantzitsua den ulertaraztea da klabea. Horretarako, aurtengo Euskaraldia baliatu nahi dugu, ikastolan euskaraz egiteko gai diren pertsona guztiak aktibatzeko.
