Duela ikasturte pare bat ikastolak Hezkidetza taldea osatu zuen. Ordutik, genero-berdintasuna, sexu-aniztasuna eta indarkeriarik eza jarri dituzte erdigunean, eta hainbat ekintza antolatu dituzte; besteak beste, jostailu ez sexisten dekalogoa, martxoaren 8aren bueltan hausnarketa-bideoa eta site-a (webgunea) zenbait baliabiderekin. Apur bat gehiago ezagutzeko, elkarrizketatxoa eskaini digute.
Nortzuek osatzen duzue Hezkidetza Taldea? Zergatik osaera hori?
Izatez, hezkuntza komunitate osoko partaideei (instituzioak, irakaslegoa eta ikasleak) dagokigun gaia da, era batean edo bestean.
Armentiaren kasuan, etapetako irakasle boluntarioek parte hartzen dugu Hezkidetza batzordean; izan ere, ikasleak erdigunean jartzen ditugu, eta gure erronkak eta hezkidetzan hezitzeko ekintzak betetze aldera, nahitaezkoa dugu adin bakoitzaren berezitasunak eta etapa bakoitzaren tutoretza plana ezagutzea.
Hala ere, zenbat eta ikuspuntu eta ideia anitzagoak, aberasgarriagoa izan daitekeela uste dugu. Ildo honetatik, komunitate osoari begirako ekimenekin aurrera egiteko, familien parte-hartzea eta elkarlana beharrezkoa ikusten dugu.
Berdintasunean heztea da abiapuntua. Nola lantzen duzue? Zein esparru edo eremutan lantzen duzue?
Hezkidetza modu planifikatu eta koordinatuan esku hartzea da, ikasle guztiek, sexu- edo genero-identitatea alde batera utzita, beren gaitasun eta trebetasun guztietan modu integralean garatzeko aukera izan dezaten. Hori horrela, berdintasuneko hezkuntzaren garapena eta genero-indarkeriaren prebentzioa ditugu helburu; hau da, genero identitateei, rolei zein estereotipoei lotutako etiketak eta jokabide moldeak saihestea, sexu-identitatearekiko, adierazpen anitzarekiko eta askatasunarekiko errespetua eta indarkeria sexista, homofobia, transfobiaren prebentzioa zein gatazken kudeaketa lantzen ditugun bitartean. Horretarako honako eremuak izango dira langaiak:
Sexismoaren aurrean pentsamendu kritikoa.
Hizkuntzaren eta irudiaren erabilera ez sexista.
Emakumeen jakinduria eta haien ekarpen sozial eta historikoa txertatzea, hauen presentzia ikaskuntzan bermatzeko.
Gatazka modu baketsuan eraldatzea, hezkidetzako bizikidetzako proiektuen bidez.
Autonomia pertsonala eta independentzia ekonomikoa.
Ikastetxeko espazioak, eskolaz kanpoko ekintzak eta jarduera osagarriak.
Hezkuntza afektiboa eta sexuala berdintasunean.
Emakumeen aurkako indarkeria, prebentzioa eta haren aurrean jardutea.
Komunitate osoari begirako ekimenekin aurrera egiteko, familien parte-hartzea eta elkarlana beharrezkoa ikusten dugu.
Zeintzuk izaten ari dira aurtengo lehentasunak? Zer egin duzue orain arte?
Hezkidetzan oinarritutako hezkuntza lortu nahi dugu, non ikasleek, berdintasunaren garrantzia ulertzeaz gain, balio horiek beraien begiradan, egunerokotasunean, bizikidetzan integratu ditzaten.
Hori dela eta, aurten, hezkidetzarekin lotutako nazioarteko egun bakoitza abiapuntutzat hartu dugu, eta gai zehatzei ikusgarritasuna eta balioa ematen saiatzen ari gara. Horretarako, informazioa eta baliabideak bildu ditugu irakaslegoari proposamenak eskaini ahal izateko, etapa bakoitzean ikaskuntza-egoerak sistematizatuak egon daitezen.
Dokumentazio hori gure site-an biltzen ari gara, irakasleentzako berariazko atal batean, hezkidetzarekin lotutako zalantzak argitu ditzaten eta irakaskuntza-prozesuan laguntza izan dezaten. Ildo berean, familientzako baliagarria izan daitekeen informazioa ere badago.
Bestalde, irakurketa errazeko eskuorri bat sortu dugu: irakasleen artean banatu eta ikastolako sarreran utzi dugu, irakaslegoak, familiek zein ikasleek eskura izan dezaten. Bertan, hezkidetzari dagozkion alderdirik garrantzitsuenak laburbiltzen dira, bai eta gaiarekin lotutako egun bereziak ere.
Honez gain, egun bereziekin lotutako kartelak sortu ditugu, ez bakarrik ikasgeletan landu ditzaten, baizik eta familien artean ere ezagutarazteko eta era kontzienteago batean berdintasunean heztearen garrantziaz ohartarazteko.
Zeintzuk dira datozen urteetako erronkak/asmoak?
Datozen urteetako erronkarik nagusienak, batetik, hezkuntza komunitateko eragileok norantza honetan inplikatzea eta, bestetik, bestelako eragileen arteko koordinazioa dira. Horretarako, ekintza-plana definitzea dugu esku artean, eta, horrekin batera, ikastolako Ziklo Pedagogikoetan gaia txertatu nahi dugu. Izan ere, hitzaldi hauek aukera aparta dira hezkidetza mahai gainean jartzeko, familien eta hezkuntzan lan egiten dugunon mesedetan.
Irakaslegoari begira, berariazko formakuntza jasotzeko asmoa ere badugu. Honekin lotuta, ikasgeletan baliagarria izan daitezkeen dinamika, jolas, eta irakurketa posibleen materialen bankua eskaintzea dugu helburu, euskarri anitzetako baliabideak helarazteko. Gainera, protokoloak zehaztu eta ezagutarazi nahi ditugu.
Azkenik, jakin badakigu egun bereziek hezkidetzaren gaia gogora ekartzen digutela, eta hori ere gure nahia dela; hala ere, gure helburua haratago doa: hezkidetza hezkuntzaren egunerokotasunean naturaltasunez bizi eta garatu nahi dugu, eta pertsona bakoitzaren balioen parte bihurtu.
Site-a sortu duzue, baliabide askorekin. Zergatik da garrantzitsua horrelako gune bat eskaintzea? Nori dago zuzenduta?
Hezkidetzari dagokion guztia ikusaraztea garrantzitsua iruditzen zaigulako sortu dugu gune hau; ez bakarrik hezitzaileei eta irakasleei begira, baizik eta ikasleei zein familiei begira ere bai.
Berdintasunerako hezkuntza etxean sustatu behar dela kontuan izanik, familien bidelagunak izan nahi dugu erabat. Zentzu horretan, gaiari buruzko informazioa konpartitu, zalantzak argitu eta hainbat baliabide eskura izateko tresna da site-a. Izan ere, kontziente gara gai potoloa dela eta batzuetan zailtasunak daudela hau trasmititu edota lantzeko. Beraz, eta esan bezala, baliabide anitzak bildu eta modu desberdinetan lanketa egiteko bitartekoak eta azalpenak txertatu ditugu, lagungarriak izango direlakoan.
