Gogan izango duzuen bezala, Euskal Herriko Ikastolak elkarteak bat egiten du Gure Haurrak ere Badira ekimenarekin, hain zuzen ere, genozidioaren harira haur palestinarrei elkartasuna adierazteko. Horrela, Armentia ikastolak ere ekimenarekin bt egiteaz gain, zenbait ekintza antolatu izan ditu.
Berriki, Israelgo armadak su etena apurtu eta beste sarraski bat egin du. Lotan ziren bitartean, 400 zibil palestinar baino gehiago erail ditu ordu gutxitan, horietako gehienak haurrak. Horrela, gertaera lazgarri hori salatzeko eta hil dituzten haur horiek gureak ere badirela erakusteko, ikastetxe guztietan elkarretaratzea egiteko deia egin dute. Izan ere, egoera horren aurrean isilik geratzeko tarterik ez dago; alegia, ezin dugu basakeria hau normalizatu. Erailtzen ari diren haur horiek gure seme-alabatzat hartu, guraso horiek gure arreba-anai bezala sentitu eta lau haizetara oihukatu behar dugu: aski da!
Ondorioz, martxoaren 24an, astelehenarekin, arratsaldeko 16:30ean ikastolako atarira biltzera deitzen dugu komunitatea, Armentiako komunitatetik ekintza hori salatu, eta Palestinako familiei gure babesa agertzeko.
Etor zaitez!
