Datorren igandean, hilaren 18an, planik ez baduzue, hona hemen ideia aproposa goizerako: Urak eginen du bide Pantailak Euskaraz ekimenaren dokumentala Zabalganako Gizarte Etxean. Euskaraldiaren bueltan antolatutako ekintza da, eta 11:00etan proiektatuko dute.
“Azken bi hamarkadetako iraultza digitalak gure bizitzetan pantailek duten pisua handitzea eta ikus-entzunezkoen eskaintza biderkatzea ekarri dute, eta horrek kontsumo-ohituren goitik beherako aldaketa ere suposatu du: sare sozialetan, interneten eta plataformetan ikusi, elkarbanatu, eta sortzen ditugu ikus-entzunezko edukiak. Baina zein hizkuntzetan iristen zaizkigu eduki horiek? Ba al du honek eraginik euskararen normalizazio prozesuan? Hainbat adituren iritzietatik eta ikus-entzunezko munduko aurpegi ezagunen esperientzietatik, euskarak pantailetan bizi dituen erronkak ezagutuko ditugu dokumental honetan”.
Ondoren, pantailetan euskaraz bizitzeko argudio eta baliabideak emango dituzte. Bien bitartean, umeek ere plana izango dute, Orion eta iluntasuna filmaren bitartez. Interesa baduzue, eman izena hurrengo loturan:
