Topera ibili dira aste honetan DBH 1eko ikasleak. Kontsumobiden izan dira asteartetik ostegunera, dieta orekatuari eta mugikorraren erabilera egokiaren inguruko tailerretan.
Dietari dagokionez, ikasleek azken egunean hartu dituzten janari guztiak zerrendatu eta ondoko datu hauek adierazi behar izan dituzte: hartu diren elikagaiak, zer ordutan hartu diren, eta elikagai bakoitzaren gutxi gorabeherako kopurua. Bisita bukatzean, ikasle bakoitza dieta orekatua egiten ari den edo jateko azturan aldaketarik egin behar duen hausnartu behar izan du.
Mugikorren erabileraren inguruan, asmakizun probak egin behar izan dituzte proposatu dizkieten kasu batzuk ebazteko. Modu horretan, kontratazioarekin eta telefoniako eta Interneteko zerbitzuekin lotutako alderdiak ezagutu eta onlineko erosketekin, kontsumo-gatazken ebazpenarekin eta ingurumen-inpaktuarekin lotutako alderdiak ezagutzeko aukera izan dute.
