Azken urteetan ikastolan arrakasta handia izaten ari den kirola da boleibola. Ikasturtez ikasturte, ilusioz izena ematen dute gure ikasleek, eta gogotsu parte hartzen dute astero entrenamenduetan eta asteburuetako partiduetan.
Jokalarien artean gelaz kanpoko harremana sendotzeko baliagarria den ekintza da ere, ez bakarrik talde edo adin berekoen artean, baizik eta kategoria ezberdinetan aritzen direnen artean ere bai. Hain zuzen ere, saretze hori indartze aldera, eta boleibola apur bat ezagunagoa egiteko, torneoa antolatu zuten abenduan.
Armentia Ikastolari dagokionez, oso harrera ona izan zuen ekimenak, eta talde gehienek parte hartu zuten. Esperientzia polita izan zen guztientzat, baina bereziki miniboleiko taldearentzako, ez baitute astebururo partiduak jokatzeko aukerarik, eta kirol honen alde hori ezagutzeko aukera ezinhobea izan da haientzat.
