Kaixo familia:
Hiru hilabete luze joan dira ikasturteari ekin genionetik, eta, honez gero, urte berria ate-joka dugu. Sasoi trinkoa izan da, ebaluazioa tartean, eta bada garaia indarberritzeko, bada garaia atsedena hartzeko.
Esan gabe doa azken aste hauek bereziak izan direla gurean, bereziki txikiei dagokienez: Argitxo heldu zen lehenik euskararen magiarekin, eta Olentzero eta Mari Domingi gure txikien buruetan dabiltza etengabe. Eta, egiari zor, txikienei ez ezik, gainerakoei ere irribarrea ateratzen zaie/zaigu garai honetan.
Nire aldetik urte berriaren hasiera ahalik eta ederrena opa nahi dizuet. Opariez harago, eta aukera izatera, jolastu, solastu etxekoekin, eta, nola ez, libururen bat egon dadila seme-alaben eskuartean.
Atxikita duzue LHko irakasle Elenak Fernández Morenok aurtengo prestatu duen zorion-txartela, berau inprimatu eta etxean jartzeko. Finean, Armentia komunitatea ikastolaz harago dago, ikastolaz harago zaudete.
Ongi-ongi izan, lagunok!
Paul Bilbao Sarria
Zuzendari nagusia
