Aitortu behar dut sentsazio bikoitza dudala. Batetik, esango nuke duela bizpahiru aste idatzi nuela ikasturte hasierako agurra ARMENTIBERRIn. Bestetik, aldiz, duela hilabete asko egin nuen sentsazioa dut. Batera zein bestera, egitatea da bagaudela konturatu gabe neguko solstizioan, eta beraz, urte berriaren atarian.
Orain, beraz, indarrak hartzeko unea iritsi zaie ikasleei (bai eta irakasle eta langileei ere, noski). Indarberrituta nahi ditugu, indarberrituta nahi zaituztegu urtarrilaren 7an. Hiruhilabete gogorra izan da, zalantzarik gabe, eta beharrezkoa erabat bateria ongi betetzea.
Nola ez, ohiko moduan, nahiko nuke eskaera bat egin. Ikastola ederki apaindua dugu, bai, baina erreparatu mesedez, bertan dauden mezuei. Batetik, ikasleek berek egindako gomendioei, besteak beste, kontsumo arduratsua sustatzeko, egun hauetan elkartasunez jarduteko etab. Bigarrenik, kontuan har itzazue Hezkidetza Batzordetik partekatutako hausnarketak, esaterako, jostailuek generorik ez dutela edota, berez ez direla sexistak; alegia, guk ematen diegula kategoria hori.
Eta nola ez, azkenik, baina ez garrantzi gutxiago duelako, euskara oparitu. Modu askotara egin daiteke opari hori, eta merke-merkea da. Eta, zuen seme-alabak are gehiago aberastu besterik ez ditu egingo.
Nire aldetik, beraz, horixe da guztia. Gogoratu idazkaritza urtarrilaren 7ra arte itxita egongo dela: zaindu, gozatu eta indarberritu!
Paul Bilbao Sarria
Zuzendari orokorra
