Ikastolok ilusioz, baikortasunez eta indar biziberrituz ekin genion ikasturte berriari, hurrengo urteei begira geure buruari jarri dizkiogun helburuak lortzeko iparra zehaztuta dugulako, kohesionatuta gaudelako eta ekin diogulako biharko ikastolak diseinatzeari, biharko Euskal Herria eraikitzeko.
Euskal Herriko Ikastolen elkarteko lehendakariak hitza hartu eta Ikastolen helburua oroitarazi zuen lehenik: "Euskaraz biziko den herri euskalduna eraikitzen ari gara". Gehitu zuen Ikastolen Elkartea dela hezkuntza erakunde nazional "bakarra", eta "auzolana eta elkartasuna" oinarri izanik, Euskal Herri osoan murgiltze eredua eskaintzen duen erakunde "bakarra" ere bai.
Hezkuntzaren kalitatea beti hobetuz joateko xedearekin, ondoko bost urteetarako geure buruari finkatu dizkiogun zenbait erronka zehaztu zituen: "Burujabetza teknologikorantz jotzea, ikasleen euskara mailan eta euskal kulturaren ezagutzan eragitea, eta ikastoletako profesionalei soziolinguistikako formazioa ematea euskarari dioten atxikimendua indartzeko", besteak beste. Horrez gain, agerian geratu zen nahi dugula ikastolak aukera erreala izatea Euskal Herriko familia guztientzat, eta bereziki "zaurgarriak direnentzat". "Herritik jaio ginen, eta herriari zor gatzaizkio", adierazi zuen Artolak, eta elkarlanerako deia zabaldu. "Herri hau eraikitzen jarraituko dugu hezkuntzatik eta euskaratik abiatuta", bukatu zuen.
Urteroko moduan, Armentia Ikastolako ordezkariak ere izan ziren Senpereko Kattalin Elizalde kolegioan gainerako ikastoletako ordezkariekin batera.
