Bada, bai. Azkenean iritsi da 2023-2024 ikasturteko azken eguna. Batzuentzat luze, beste batzuentzat labur, baina egia ere bada ekainaren 21a iritsi dela eta, beraz, udako solstizioarekin batera ondo merezitako etena hartzeko garaia heldu zaiela gure ikasleei.
Batzuk ikastolan izango zaituztegu udako eskaintzan, eta beste batzuk irailera arte ez zaituztegu ikusiko. Nire aldetik, hiruzpalau eskaera: lehenik eta behin, udaz gozatu eta indarberritu. Zuen bateriak ahalik eta gehien bete hurrengo ikasturteari indarrez ekiteko. Bigarrenik, probestu oporraldiak eskaintzen dizkizuen aukerak eta utzi pantailak albo batean, bizi ezazue ingurunea. Hirugarrenik, zeuon buruari liburu bat irakurtzeko erronka jar iezaiozue, badago zer aukeratu, ez zaizue damutuko, eta azkenik, baina garrantzitsuena, udan euskaraz bizi.
Ikastolako idazkaritza zabalik egongo da goizeko ordutegiarekin uztailaren 19ra arte, eta lanera itzuliko gara abuztuaren 26an.
Besterik ez, beraz, zaindu eta gozatu!
Paul Bilbao Sarria
Zuzendaria
