Arabako Eskolarteko Bertsolari Txapelketaren 28. edizioa jokatu dute larunbatean Aramaioko Kultur Etxean, eta Maddi Agirre ikastolako ikaslea izan da berriz ere garaile.
Bertsozale bidez
Larunbatean jokatu da 14-18 urte bitarteko Arabako Eskolarteko Txapelketa Aramaion. Kultur Etxeko aretoa bete da, eta giro bikainean joan da iluntzea. Maila oneko bertsoak entzuteko parada izan dute bertaratutako haur gazte eta zein helduek.
Arratsaldeko 19:30ean hasi dira finaleratutako sei gazteak kantuan, Maddi Agirre, Iraide Onaindia, Sabin Abarrategi, Eukene De los Aires, Gari Arexolaleiba eta Hegoi Amabizka. Motorrak berotuta, taula gainean sei aritu dira kantuan zortziko handian naiz txikian, puntuari erantzunez edota hitza gaitzat hartuta bakarkoan, maila ederra erakutsi dute denek ere. Edizio honetan ere txapelaren jabe Maddi Agirre egin da hirugarrenez, eta beraz, aurtengoan ere, bere etxean pasatuko du txapeldunek eskurik esku urtez urte pasatzen duten egurrezko mikrofonoa.
Honenbestez, ekainaren 3an Durangaldean burutuko den Euskal Herriko finalean Maddiz gain Sabin Abarrategi, aramaioarra ere arituko da Arabako ordezkari gisa. Urtez urte eta edizioz edizio edertzen doan txapelketa da gurea. Jarraitu dezagun lanean, bertsoz bertso Araba kantuz bustitzen!
Hemen txapeldunaren agurra:
Eskerrik asko Aramaio
guzti honen erruduna
muxu haundi bat Eukene
nire betiko laguna
Sabin, Hegoi, Gari, Iraide
a ze nolako jarduna
familiari, harriak
bihurtzeagatik luma
nahiz ez egon aizparentzat
doa nire maitasuna
zuek juerga on bat bota
alai amaitu eguna (bis)
esku onetan baitago
Arabako etorkizuna
Jatorrizko albistea: Bertsozale.eus | Maddi Agirrek jantzi du Arabako bertsolari gaztetxoen bertsolari txapelketako txapela
