Ikastolen Elkartea bidez
Datorren larunbatean, hilaren 22an, 17:00etan, azterketak euskaraz egiteko eskubidea aldarrikatzeko manifestaldia izango da Baionan, azterketak euskaraz egiteko eskubidearen alde. Hauxe Seaskako lankideek helarazitako informazioa:
“Urte luzeetako ikastolen borrokari esker, Ipar Euskal Herriko ikasleek Brebeta (DBH3n egiten den froga) euskaraz izatea lortu da. Baina, gaur egun, oraindik Baxoko frogak (Frantziako selektibitatea) osoki frantsesez egin behar dituzte gure ikasleek, nahiz eta ikasketa guztiak euskaraz egin!
Azterketa guztiak euskaraz izan daitezen lortu behar dugu
Ikastolei esker, geroz eta gehiago dira euskaraz ikasten duten ikasleak. Baina aldi berean, askoz gehiago dira Frantziatik Ipar Euskal Herrira bizitzera heldu diren frantses aberatsak, euskara eta euskal kulturarekiko inolako sentikortasunik ez dutenak.
Benetako hizkuntza politika ausarta behar du euskarak Ipar Euskal Herrian. Apirilaren 22an Frantziako Gobernuari, Akitaniari, Pirinio Atlantikoei eta Euskal Elkargoari mezu argia helarazi behar diegu: euskarak bizi behar du, eta horretarako, Euskararen Hitzarmen berri bat lortu behar dugu”.
Lapurdi, Nafarroa Behera eta Zuberoako anaia-arrebek gure sustenguaren beharra dute. Goazen!
