Nazio Batuen Erakundeak azaroaren 20an ezarria du Haurren Munduko Eguna. Egun horretan, NBEren Batzar Nagusiak Haurren Eskubideen Adierazpena onartu zuen 1959an, eta Haurren Eskubideei buruzko Konbentzioaren azken testuaren akordioa 1989an. Hitzarmena sinatu duten herrialde guztiek nahitaez bete behar dute. Deklarazioak haurren protagonismoa aitortzen du eskubidedun subjektu gisa, eta haurren eskubideen babesa bermatzeko funtsezko arau batzuk ezartzen ditu.
Aurten, azaroaren 20an, Palestinako haurrei ez zaie bermatuko Deklarazioak aitortutako eskubidea, ez eta protagonismoa ere. Horrexegatik, Armentia Ikastolak, Euskal Herriko Ikastolen Elkarteak bezalaxe, bat egingo du Gure Haurrak ere Badira ekimenarekin eta ikastolako sarreran Palestinako bandera xingola beltzarekin jarriko dugu, horren sinboliko bihurtu diren bi oinetakorekin batera.
