Margotu, garbitu, bonbilak aldatu, ubideak txukundu… komunitatearen esku guztiak dira ongi etorriak Auzolanean. Izan ere, denok lagundu dezakegu zerbaitean, inor ez dago soberan.
Horrexegatik, gaurdanik, azaroaren 16an egutegia borobil batez inguratzeko eskatu nahi dizuegu. Handia bezain ederra da egun horretan ikastolan sortzen den giroa, gurasoen eta langileen artean sortzen den konplizitatea. Finean, denon eskuak Armentia Ikastolaren beharretara jartzen ditugu, eta ikastolako kide sentitzeko aukera ezin hobea da.
Gogoan izan ezazue, beraz, guztion laguntza dela beharrezkoa. Denok dugu zer egina, akaso, batzuek eskarmentu edo aditu izango dira lan batzuetan, eta hori ere jakin nahi dugu; eta beste askok agian uste dute ez dutela laguntzerik. Bada, ez da horrela, denok dugu lantxoren bat.
Hain zuzen ere, hori guztia antolatzeko ordua iritsi da, eta zuen prestutasuna ezagutu nahi dugu:
Ohiko moduan 9:00etatik 13:00etara izango gara, tartean elkarrekin egingo dugu hamaiketakoa, eta, noski, umeentzako zaintza-zerbitzua eskainiko dugu.
Beraz, gorde data egutegian eta anima zaitez!
Ikasleen eredu
Beti nabarmentzen dugu gure izaera kooperatiboa, guretzat hain garrantzitsua den ezaugarrietako bat. Denon artean egiten dugu ikastola, auzolanean, eta hori gure ikasleei transmititzea ezinbestekoa iruditzen zaigu. Horregatik, balore horren isla ikusten dugunean, poztasunez eta harrotasunez jantzi eta zuekin partekatu behar dugu.
Hain zuzen ere, aurreko asteetan, DBH 4ko ikasleak jolasorduan bi eserleku konpontzen aritu dira, auzolanean. Lan fina!
