Astebururako planik ez baduzue oraindik, familia giroan pasatzeko proposamen berezi bezain polit batekin gatorkizue gaurkoan: Ikusi Mikusi euskarazko haur eta gazte literatur azoka. Mota horretako lehen azoka da Euskal Herrian, eta aukera paregabea eskaintzen du kultur arlo berezi honetan gure hizkuntzan sortutako lanak ezagutzera emateko -bereziki, aurten argitaratu direnak-.
Gure herriko kultura plazara ateratzen dituzten hitzordu asko ditugu -Durangoko Azoka, kasu-. Euskal literaturak, eta batez ere, haur eta gazteei zuzendutakoak, ordea, ez du merezi duen neurriko lekua aurkitu gure txokoetan.
Hori dela eta, aurten laugarrenekoz, Ikusi Mikusi azoka antolatu dute Saran (Lapurdi). Urriaren 11n eta 12an izango da, eta modu ibiltarian eta gune ezberdinetan antolatuta dago. Jaialdi itxura duen heinean, herri guztia zeharkatuko du, eta, familientzat pentsatuta dagoenez, mota askotariko espazioak eskainiko ditu: haurren gune egokitu eta berezia, kanpoko jolasak, atseden puntuak…
Ekitaldi berritzailea da zeharo, eta ezinbesteko hitzordu kulturala bilakatzea du helburu. Euskarazko literatura oinarri, proposamen ugariz gozatzeko parada izango da; hala nola, ikuskizunak, tailerrak eta animazioak. Egun osoko egitarau oparoa prestatu dute.
