Arabako ikastolen egun handia izango da igandean Olarizun: Araba Euskaraz. Ekimenez beteta etorriko da, eta adin guztietako bisitarientzat izango dira antolatutako ekitaldiak: Arte Eszenikoak, Go!azen-en karaokea, “Mugaezin Txoua!”, Dantza Plaza, Zunba... Horekin batera, euskal dantzen topaketa eta bertsoak ere izango dira. Halaber, nola ez, kontzertuak ere izango ditugu; Ibil Bedi, Janes Lester, Burutik eta DJ Malandro. Esan bezala, beraz, bete-beteta dator eguna.
Aurreratu izan dugun bezala, aurtengo irabaziak Oiongo San Bizente ikastolarentzat izango dira. Izan ere, hori ere bada Euskal Herriko Ikastolak elkartea osatzen dugunon ezaugarria: elkartasuna. Eta Errioxako ikastola bat protagonista izango dela kontuan harturik, aurten Araba Euskaraz omenduko duen erakundea ere Errioxakoa da, hain zuzen ere, azken hamarkadatan ehunka heldu euskaldundu dituen IKA eragilea.
