Hirugarren Ziklo Pedagogikoaren hiru eta laugarren saioak izango ditugu aste honetan, asteartean eta ostegunean hurrenez hurren. Lehen saioan Osakidetzan diharduen Maribi Armendariz Iraola izango dugu. Psikologo klinikoa da Armendariz, haur eta nerabeen psikologian eta estres post traumatikoan espezializatua. Zenbait galdera partekatuko ditu hitzartzean: gure haurrek eta gazteek pairatzen dituzten osasun mentaleko arazoak, norbanakoen zailtasunetan dute oinarria edo gaur egungo gizartearen arazo kolektibo bat gisa ulertu behar dugu? Narzizismoa nahasmen bat da edo gaur egungo gizartearen ondorio bat? Zeintzuk dira gaixotasun mentalaren prebentziorako gurasook kontutan hartu beharrekoak? Zalantzarik gabe hausnarketa interesgarria eragingo duten galderak.
Bestalde, hilaren 23an, psikopedagogo, gizarte hezitzaile, haur masajeko hezitzaile eta komunikazio ez bortitzean aditu Nerea Mendizabalek gidatuko du hitzaldia. Bertan, umeak zein puntutaraino babesten ditugu izango du hizpide. Izan ere, guraso bezala zenbait alorretan behar duena baino gehiago edo gutxiago ematen egon gaitezke denok. Gauzak horrela, nola bultzatu haurren autonomia eta aldi berean, haurrak behar duena ematen ari naizen segurtasuna eduki? Galdera horren bueltan jardungo dugu, beraz, Mendizabalekin.
