Aurreko astean komentatu genizuen bezala, hezkuntza komunitateko eragileek, Euskalgintzaren Kontseiluaren ekimenez, ‘Hezkuntzak euskara gehiago behar du’ sinadura bilketa abiatu dute asteartean. Helburua, EAEko Hezkuntza Lege berriak euskara eta euskal kultura ardatz izan ditzala, eta euskarazko ikasteredu orokortua jaso dezala eskatzea da. Zehazki, hiru puntu hauek lege berrian jaso daitezen eskatuko diete Legebiltzarreko kideei:
- Euskara ikas- eta irakats-hizkuntza izango duen eredu orokortu inklusiboa
- Euskal kultura ardatz izango duen euskal curriculuma.
- Hezkuntza ez-arautua osorik euskaraz garatzea.
Azaldu dutenez, sinadura bilketa honen bidez, Araba, Bizkai eta Gipuzkoako herritar guztiei zabaldu nahi diete hezkuntzak euskara gehiago behar duela adierazteko eta aldarrikatzeko bidea.
Armentia ikastolak ere bat egin du ekimenarekin, eta parte hartzeko deialdia luzatu nahi dizuegu. Sinadura bilketa hilabetez luzatuko da, irailaren 12tik urriaren 15era arte. 16 urtetik gorako herritarrek sinatu ahal izango dute, bi modutara:
- Modu presentzialean, sinatzeko jarriko diren mahaietan.
- Internet bidez, www.euskaragehiago.eus webgunean.
