Aurreko ekainaren 1eko batzarreko parte-hartze faltaren ondorioz, Armentxo Guraso Elkarteak hurrengo komunikatua zabaldu nahi du:
"Ikastolako familia guztiok jaso genuen gure ikastolaren guraso elkartea den Armentxoren urteroko batzarrerako deialdia. Aurreko asteko ostegunean izango zen baina ama bakarra hurbildu zen Armentxoko juntako kideok azaldu behar genituen kontuak ezagutzera.
Gauzak horrela, eta ikusita azkenengo urteetan ikastolako egunerokotasunean parte hartzea ez dela gure komunitateko familia gehiengoaren interesekoa, oraingo juntak erabaki genuen guraso elkartea desagertaraztea.
Indarrak eta gure denbora eman ditugu eskola orduetatik kanpoko ikastolako bizitza bultzatu nahian, gure seme-alabentzako bestelako ekintzak prestatzen, gurasoentzako formakuntza saioak antolatzen, ikastolarekin batera egiten diren festen antolakuntzan parte hartzen… Baina errelebo faltak, batetik, eta familia gehiengoaren interes ezak, bestetik, Armentxo desagertaraztearen erabakia hartzera bultzatu gaituzte. Badira urteak gutako batzuk daramatzagunak honetan baina argi daukagu ez dela gure proiektu pertsonala baizik eta ikastolaren komunitatearena izan behar dela; baina denborak erakutsi digun bezala, ez da horrela.
Espero dugu laister bolondres berriak agertzea Armentxo berpiztu nahian.
Sinatuta: Armentxoko junta".
